ڈیرہ اسماعیل خان: تھانہ یارک میں تعینات حوالدار اور ایک کانسٹیبل کو نان کسٹم پیڈ گاڑیوں کے سمگلنگ میں ملوث ہونے کے انکشاف پر گرفتارکرلیاگیا،تفصیلات کے مطابق ڈیرہ پولیس میں سزوجزا کا عمل تیزی سے جاری ہے ، ڈی پی او ڈیرہ کیپٹن ر نجم الحسنین لیاقت کی جانب سے چند روز قبل بین الصوبائی شاہراہ پر واقع مغل چیک پوسٹ پر رشوت لینے کی شکایت پر آٹھ پولیس اہلکاروں کو گرفتار کر کے ان کے خلاف مقدمہ درج کر لیا گیا ۔ گزشتہ روز ضلع ڈیرہ اور ضلع لکی کے سنگم پر واقع تھانہ یارک میں تعینات حوالدار اور ایک کانسٹیبل کو نان کسٹم پیڈ گاڑیوں کے سمگلنگ میں ملوث ہونے کا انکشاف سامنے آگیا جس میں سمگلروں سے گاڑیاں پار کرانے کی رشوت بذریعہ ایزی پیسہ لینے کے شواہد پائے جانے پر دونوں پولیس اہلکاروں کو گرفتار کرکے ان کے خلاف مقدمہ درج کیاگیا ہے ،پولیس شعبہ تفتیش ذرائع کے مطابق مذکورہ دونوں پولیس اہلکاروں کے موبائل فون اور ایزی پیسہ کے ڈیٹا سے رقم کی ترسیل کے میسجز بھی پکڑے گئے ہیں ،ڈی پی او ڈیرہ کا کہنا ہے کہ سزا اور جزا کے بغیر اصلاح کا عمل مکمل نہیں کیا جاسکتا ، کسی بھی کرائم میں ملوث ہونے پر پولیس اہلکاروں کے خلاف بلاتفریق کاروائی عمل میں لائی جائے گی اور کسی بھی جرم میں ملوث اہلکاروں کو ہرگز معاف نہیں کیا جائے گا۔
